ໃນວັນທີ 17 ສິງຫາ 2020 ນີ້, ທ່ານ ປອ ໄຊສົມພອນ ພົມວິຫານ ກໍາມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ (ສນຊ) ໄດ້ຕ້ອນຮັບການເຂົ້າຢ້ຽມຂໍ່ານັບຂອງທ່ານ ປອ ຈັນແສງ ພິມມະວົງ ຮອງລັດຖະມົນຕີ ກະຊວງ ວິທະຍາສາດ ແລະ ເຕັກໂນໂລຊີ, ຮອງປະທານສະມາຄົມ ສິລະປະສຽງແຄນລາວ ພ້ອມດ້ວຍຄະນະ ມີບັນດາທ່ານຫົວໜ້າ-ຮອງຫົວໜ້າກົມ, ຫ້ອງການ ເຂົ້າຮ່ວມ.
ໂດຍປະຕິບັດຕາມ ທິດຊີ້ນໍາຂອງຂັ້ນເທິງ ໃນການຈັດຕັ້ງງານມະໂຫລານ ສະແດງສິລະປະວັດທະນະທໍາ ເພື່ອສະເຫຼີມສະຫຼອງ ວັນຊາດ ຄົບຮອບ 45 ປີ, ວັນຄ້າຍວັນເກີດ ປະທານ ໄກສອນ ພົມວິຫານ ຄົບຮອບ 100 ປີ ແລະ ວັນສໍາຄັນຂອງພັກຂອງຊາດປີ 2020, ວັນສ້າງຕັ້ງສະມາຄົມສິລະປະແຄນລາວ ຄົບຮອບ 15 ປີ, ວັນຄົບຮອບ 3 ປີ ສຽງແຄນເຊື້ອຊາດລາວທີ່ໄດ້ຮັບການຈົດທະບຽນເປັນມໍຣະດົກໂລກ.
ສະມາຄົມສິລະປະແຄນລາວ ແມ່ນອົງການຈັດຕັ້ງສັງຄົມ, ວິຊາຊີບ, ປະດິດຄິດແຕ່ງ ທີ່ບໍ່ຫວັງຜົນກໍາໄລ ຊຶ່ງເປັນຕົວແທນໃນການເຕົ້າໂຮມເອົານັກສິລະປິນ ຫມໍແຄນ, ຫມໍຂັບຫມໍລໍາ ແລະ ຊ່າງເຮັດແຄນ ໃນຂອບເຂດທົ່ວປະເທດ ແລະ ຜູ້ທີ່ມັກ ຮັກສິລະປະແຄນລາວດ້ວຍຄວາມສະຫມັກໃຈ; ມີບົດບາດຫນ້າທີ່ ໃນການອະນຸລັກຮັກສາ ແລະ ເສີມຂະຫຍາຍມູນເຊື້ອສຽງແຄນເຊື້ອຊາດລາວ ມໍຣະດົກໂລກ ໃຫ້ມີການພັດທະນາ ແລະ ຍືນຍົງຄົງຢູ່ຄູ່ກັບຄົນລາວ, ຊາດລາວ ແລະ ໃນໂລກຕະຫຼອດໄປ.
ສະມາຄົມສິລະປະແຄນລາວ, ສໍານັກງານ ຢູ່ຊັ້ນ 4 ຫໍວັດທະນະທໍາແຫ່ງຊາດ, ບ້ານອານຸ, ເມືອງຈັນທະບູລີ, ຖະຫນົນສາມແສນໄທ, ນະຄອນຫລວງວຽງຈັນ Website: www.klaa.com.la ; ໂທລະສັບ: +856 20 55002081; E-mail: khamphanh.mstd@gmail.com .